Búið að sæða

Dóra var sædd í gær og í dag.

Nú er ekkert meira hægt að gera í bili en að krossa fingur og vona að náttúrunni sé þóknanlegt að úr þessu verði til Bernerkrútt fyrir okkur.

Dóra fer í sónar 18. ágúst - þangað til veit enginn hvað verður.

Sæðið er komið!

Þá er sæðið komið til landsins og í vörslu Helgu Finns.

Fyrstu mælingar hjá Dóru sýna að hún er að byrja að fara upp og ef ferillinn heldur sér í mælingu á morgun verður hugsanlega byrjað að sæða á mánudaginn.

Þetta er allt að gerast.

Sendingin á leiðinni...

Sendingin er lögð af stað, reyndar enn í Þýskalandi en á leiðinni engu að síður :-D

Fyrsta hjalla lokið.

Aftur í gang

Isberner-síðan hefur legið í dvala um nokkurt skeið. Eftir að Folda dó 20. október 2009 hætti ég að skrifa um hundamál, en nú skal bætt úr því.

Dóra varð íslenskur meistari á sumarsýningunni 2010 og titlar sig nú ISCh Isa-Dora vom Stieracker. Hún er orðin 4ra ára gömul og er afar ljúf og skemmtileg tík. Þjálfun hennar hefur verið mest fyrirhafnarlaus, enda kenndi Folda henni allt sem hún þarf að vita og skiptir máli.

Við vonumst til að geta fært ykkur fréttir jöfnum höndum og lofum að halda okkur betur við efnið.

Frábærlega vel heppnuðum Stórhundadögum sem fram fóru í versluninni Garðheimum þessa helgi er lokið.

Við tókum þátt í tegundakynningu á Bernarfjallahundum eða Berner Sennen á frummálinu á Stórhundadögum þessa helgi.

Laugardagurinn gekk vel. Dóra var ánægð með alla athyglina, klapp og klór gestanna, en þreytt þegar heim var komið á laugardagskvöld. Folda var ekki jafn ánægð. Henni þótti þessi uppákoma bjóða upp á fullmikla athygli ókunnugra og var því bara stutta stund í senn á tegundabásnum okkar. Sérstaklega var skondið að þegar hún var tekin inn í smá stund meðan Dóra og Eiko fengu hvíld um miðjan daginn vildi hún helst bara liggja en brölti á fætur og leyfði börnum að klappa sér en dróg sig svo í hlé þegar gestirnir voru fullorðnir.

Á sunnudeginum gekk miklu betur. Til að byrja með vildi Folda samt alls ekki fara aftur inn í þetta hús. Þegar hún var hins vegar komin á básinn leið henni betur og tók ástfóstri við ýmsa gesti við fyrstu kynni. Dóra var rólegri en á laugardeginum, en átti nokkra góða spretti, sérstaklega þegar börn litu við hjá okkur. Þær voru þó báðar einstaklega hamingjusamar þegar Ingibjörg og Alexandra vinkonur okkar litu við.

Við fengum afar jákvæð viðbrögð. Flestir höfðu áhuga á að vita til hvers tegundin hefði verið notuð og hvaðan hún væri upprunnin, og nokkrir féllu algjörlega í stafi við fyrstu kynni rétt eins og ég fyrir sex og hálfu ári

Þetta var í heildina mjög skemmtilegt og þrátt fyrir að hér liggi nú og sofi afar þreyttar Berner-stelpur hlökkum við mikið til næstu Stórhundadaga!

Myndir komnar á vef HRFÍ frá haustsýningunni:

Dómarinn sem gaf bæði íslenskt og alþjóðlegt meistarastig, Dóra og Dóra:

Nöfnurnar stoltar með 4. sætið í tegundahóp 2:

Dóru gekk alveg svakalega vel á Haustsýningu HRFÍ sem fram fór núna um helgina.

Hún keppti á laugardaginn, 27. sept. 2008, og varð besti hundur tegundar og fékk bæði íslenskt og alþjóðlegt meistarastig.

Þá bætti hún um og gerði enn betur með því að verða í 4. sæti í tegundahóp - litla flotta dúllan mín

Lífið er að komast í fastar skorður á Íslandi efir rúman mánuð saman á nýjum stað í nýrri íbúð í nýju umhverfi.

Það hýrnaði mikið yfir Ísunum þegar dótið okkar loksins kom í hús í síðustu viku og þær borða mun betur eftir að þær fengu sínar skálar og sitt dót. Dóra er reyndar kannski fullmikið komin heim, er aftur farin að naga sér til dundurs og núna er það dyrakarmurinn við útidyrnar - kannski greyið sé að reyna að brjótast út?

Stefnum að því að koma okkur upp nýrri æfingarútínu og taka agann föstum tökum, en Ísurnar hafa verið í löngu orlofi frá uppeldi - og betur má ef duga skal, sérstaklega með Dóru litlu sem er á gelgjuskeiði og þarfnast fastra verkefna og reglubundinna æfinga.

Þar sem allt útlit er fyrir gott helgarveður eru uppi áform um dráttaræfingu - og þá aldrei að vita nema Dóra verði spennt fyrir vagn í fyrsta sinn, enda búin að ná leyfilegum aldri!

Folda tekur öllu af meira jafnaðargeði. Ég sé það betur núna að hún er ekki bara hlýðin og róleg, heldur líka farin að eldast, þreytist og mæðist mun fyrr en áður var. Samt er hún í góðu formi og hleypur léttfætt yfir hvað sem er, hvort heldur sem er möl og mólendi eða í mosagrónu hrauni. Hún er hins vegar síður að flýta sér og er farin að drolla í lok langra göngutúra. Hún er líka farin að bíta Dóru mun harkalegar af sér og gerir henni fullvel ljóst þegar leikir og slagsmál eru ekki leyfð.